Paul Pogba avuga ko gukurwa ku mwanya wa kapiteni wungirije nta ngaruka byamugizeho

Paul Pogba agira ati: "Nkora icyo [umutoza] ambwiye gukora. Ndabyishimiye. Mbikora nishimye".
Insiguro y'isanamu,

Paul Pogba agira ati: "Nkora icyo [umutoza] ambwiye gukora. Ndabyishimiye. Mbikora nishimye".

Paul Pogba, umukinnyi wo hagati wa Manchester United, avuga ko nta ngaruka yagizweho no kuba umutoza Jose Mourinho yaramukuye ku mwanya wa kapiteni wungirije mu ikipe ya Manchester United, akavuga ko akina afite "ibyishimo".

Pogba w'imyaka 25 y'amavuko, yakuwe ku mwanya wa kapiteni wungirije mu mpera y'ukwezi kwa cyenda uyu mwaka.

Pogba yagize ati:

"Kunyaka igitambaro [nka visi kapiteni], nta kintu na kimwe bihindura".

"Icyo nshaka gusa ni ugukina uko nshoboye kose. Nta ngaruka byangizeho".

"Nishimiye kwambara umwenda wa Manchester United, [gukinira] iyi kipe. Mu kibuga, iteka [nkina] mwenyura".

Mu mikino ibiri yo muri shampiyona y'uyu mwaka, Pogba yabaye kapiteni w'iyi kipe mu gihe Antonio Valencia atari mu kibuga kubera imvune, ariko mu kwezi kwa cyenda abwirwa ko atazongera kuba kapiteni wungirije w'iyi kipe.

Nubwo bimeze gutyo, umutoza Mourinho avuga ko umubano we na Pogba utahungabanye.

Insiguro y'isanamu,

Jose Mourinho mu kiganiro n'abanyamakuru kuri uyu wa gatatu

Mu kiganiro n'abanyamakuru kibanziriza umukino wo kuri uyu wa gatatu Manchester United ikinira mu Butaliyani n'ikipe ya Juventus mu mikino ya Champions League, Mourinho yagize ati:

"Ntekereza ko tubanye neza. Navuga ko ari umubano mwiza hagati y'umutoza n'umukinnyi w'umupira w'amaguru".

Pogba yageze mu ikipe ya Manchester United mu mwaka wa 2016 aguzwe miliyoni 89 z'amapawundi - icyo gihe akaba ari yo mafaranga ya mbere menshi cyane ku isi yari aguzwe umukinnyi w'umupira w'amaguru.