Canada yabujije kohereza mu mahanga ku bwinshi imiti yandikirwa abarwayi

Itegeko ryo muri Amerika ryari gutuma abacuruza imiti bo muri icyo gihugu bashobora gutumiza imiti igenewe isoko ryo muri Canada
Insiguro y'isanamu,

Itegeko ryo muri Amerika ryari gutuma abacuruza imiti bo muri icyo gihugu bashobora gutumiza imiti igenewe isoko ryo muri Canada

Canada yabujije kohereza mu mahanga imiti imwe n'imwe yandikirwa abarwayi na muganga, mu rwego rwo kwirinda ko ibura mu gihugu.

Iki cyemezo kije gikurikira gahunda y'Amerika yari gutuma imiti nk'iyo itumizwa muri Canada kugira ngo ihendukire kurushaho Abanyamerika.

Nubwo ibiciro by'imiti yandikirwa abarwayi yo muri Canada biri hejuru cyane ugereranyije no mu bihugu bimwe, irahendutse kurusha iyo muri Amerika.

Bimwe mu bigo bikwirakwiza imiti byo muri Canada byari byaburiye ko iyo gahunda y'Amerika, yashyizwe mu bikorwa na Perezida Donald Trump, yari gutuma habaho ibura ry'imiti muri Canada.

Icyorezo cya coronavirus gisanzwe cyarongereye umubare w'abacyenera imiti imwe n'imwe, nkuko bitangazwa n'ibiro ntaramakuru AFP.

Itangazo rya minisiteri y'ubuzima ya Canada ryavuze ko iki gihugu gikura 68% by'imiti mu mahanga, ko rero ari ingenzi kwirinda ko habaho kubangamira ikwirakwizwa ry'imiti mu gihugu.

Iryo tangazo rigira riti:

"Ubu kompanyi zigiye gusabwa no gutanga amakuru mu kugenzura ibura risanzweho cyangwa rishobora kubaho [ry'imiti] uko zizajya zibisabwa, kandi mu gihe cy'amasaha 24 nihabaho cyangwa hagiye kubaho ikibazo gikomeye mu buvuzi".

Mu kwezi kwa karindwi, Bwana Trump yashyize umukono ku itegeko-teka ryemerera mu rwego rw'amategeko gutumiza muri Canada imiti ihendutse kurushaho.

Mu kwezi kwa munani, Minisitiri w'intebe wa Canada Justin Trudeau yavuze ko yakwishimira gufasha ibindi bihugu mu kubona imiti mu gihe byaba bishobotse, ariko avuga ko icyo ashyize imbere ari ukurinda ubuzima bw'Abanya-Canada.

Inganda zikora imiti zimaze igihe zinengwa n'abanyapolitike bo muri Amerika - barimo na Bwana Trump - ndetse na kompanyi z'ubwishingizi n'imiryango irengera abarwayi, kubera igiciro gihanitse cy'imiti mishya ndetse n'izamuka ry'ibiciro ku miti imwe yari isanzweho.

Perezida watowe muri Amerika Joe Biden, mbere yigeze kuvuga ku kuba yatumiza imiti mu mahanga mu rwego rwo gutuma ibiciro byayo bigabanuka.