Rwanda – Coronavirus: Imvo n'Imvano ku ngaruka Covid-19 yagize ku banyamuziki

Ndabashuhuje nshuti muteze amatwi BBC, uyu ni umwanya w'ikiganiro Imvo n'Imvano, turi ku wa gatandatu, itariki ni ya 28 z'ukwezi kwa 11, umwaka wa 2020.

Ikiganiro cyacu uyu munsi kiribanda ku ngaruka icyorezo cya Coronavirus cyagize ku bahanzi, cyane cyane abanyamuziki.

Hashize amezi asaga 10 abanyamuziki benshi bicaye nta kazi bafite. Benshi amaramuko bayacyeshaga ibitaramo bakoraga mu tubari, mu mahoteli, mu bukwe no mu myidagaduro itandukanye.

Kugeza ubu ibigendanye n'imyidagaduro ihuza cyangwa igahuriramo abantu benshi birabujijwe ku mpamvu zo kwirinda iki cyorezo cya Coronavirus.

Gusa inama y'abaminisitiri yateranye ku wa gatanu yemeje ko imyidagaduro n'ibitaramo ndangamuco "bizagenda bifungurwa buhoro buhoro hubahirizwa amabwiriza yo kwirinda COVID-19". Iyo nama y'abaminisitiri yongeyeho ko amabwiriza arambuye azatangwa n'inzego zibishinzwe.

Muri iki kiganiro turavugana n'abanyamuziki batandukanye batubwire ubuzima babayeho n'uburyo bari kugerageza kwivana mu bibazo.

Insiguro y'isanamu,

Umuhanzi Uwitonze Clémentine 'Tonzi' (wambaye ikanzu) yabonye igihembo cy'indirimbo yakunzwe muri Covid-19

Hagati aho ariko, leta y'u Rwanda yatangije ikigega ivuga ko kigomba gufasha abahanzi nka rumwe mu nzego zazahajwe na Covid-19. Icyo kigega cyashyizwemo miliyoni 300 z'amafaranga y'u Rwanda ashobora kongerwa.

Bitangazwa ko ayo mafaranga azahabwa imishinga 30 y'ubuhanzi izarusha iyindi ikaba kandi ari imishinga ishobora gutanga umusanzu ufatika mu guhindura imikorere n'ubuzima bwa benshi mu bahanzi.Turaha ijambo ministeri ifite umuco n'ubuhanzi mu nshingano zayo itubwire uko iby'icyo kigega biteye.

Ikiganiro Imvo n'Imvano cyo kuri uyu wa gatandatu mwagiteguriwe kandi murakigezwaho na Yves Bucyana.